Florencio Segura Gutiérrez

Florencio Segura Gutiérrez sutiyuq runaqa (1912 watapi paqarisqa Talawira llaqtapi, Apurimaq suyupi; 2000 watapi wañusqa Talawira llaqtapi) huk piruwanu prutistanti pasturmi, taki qillqaqmi, t'ikraqpas karqan.

Kawsasqan

Florencioqa Talawirapi kaq ayllupi iskay wawqiwan, iskay panawan wiñarqan iskay simita kastilla simi, qhichwa simi) rimaspa. Tukuy ayllu 1930 watakunapi kristiyanu tukuspa prisbitiryanu iwanhiliku inlisyaman yaykurqan. Florencioqa Lima llaqtapi chukcha rutuq tukuspa Wamanqa llaqtapi kikinpa chukcha rutuna tindatam kicharqan. Chaypi Inés sutiyuq warmita riqsirispa kasarakurqan. Kikinpa tindanpi Alonso Hitchcock sutiyuq inlis misyunaryuta riqsirqaspa paywan Chuya Qillqata kastilla simipi ñawiriyta qallarispa 23 ñiqin hatun puquy killapi 1937 watapis kristiyanu tukurqan. Chaymantataqsi kristiyanu rimay takikunata qillqayta qallarirqan, ñawpaqta kastilla simipi, qhipaqtataq qhichwa simillapi. 1941 watapi Talawiraman kutimurqan, tindanwan mana aypaspa. 1943 watapi riqsirisqan Kenneth Case sutiyuq misyunaryuwan kuska chay rimay takikunapaq takinakunatas qillqarqan. 1946 watapim ñawpaq takina liwrun uyaychasqa karqan, Dyuspa Siminmanta Takikuna nisqa. Chaymantataqmi achka kristiyanu takikunatam qillqarqan, qhichwa simillapim, achka pachak takim. Homer Emersonwan, Kenneth Casewanpas Musuq Rimanakuytam Chanka Runasimiman tikrarirqan. Lukaspa Qillqasqan, Huwanpa Qillqasqanpas 1954 watapim paqarirqan, tukuy Musuq Rimanakuytaq 1958 watapim. 1962 watamanta 1983 watakama Florencioqa Wanta llaqtapi kristiyanu Radio Amawta nisqapim llamkarqan. Chaypacha Fernando Quicañawan, Rómulo Sauñe Quicañawan, hukkunawanpas TAWA (Tawantinsuyuman Allin Willakuy Apaqkuna) nisqa imwanhiliku tantanakuytam kamarirqan. 1983 watapi Florencioqa Talawiramanmi kutimurqan. Chaypi wañusqankama warminwan kawsarqan.

Florenciop takinkunta kunankamapas tukuy urin Piruwpi iwanhiliku inlisyakunapim takinku. Diospa Siminmanta Takikuna nisqa takina liwrunqa achka kutim uyaychasqa karqan, 1979 watapi 18 kutiñam. Takinkunaqa huk takina liwrupim kan, ahinataq Allin Willaykunaq Takinkuna, Iñiq T’aqaq Akllasqa Takinkuna nisqa liwrukunapim.

T'ikrasqan qillqakuna

• Juampa qillqasqan Evangelio. United Bible Societies / Sociedades bíblicas unidas, 1954. T'ikraqkuna: Florencio Segura, Homer P. Emerson. 68 pp.
• Lukaspa qillqasqan Ibangilyu. United Bible Societies / Sociedades bíblicas unidas, 1954. T'ikraqkuna: Florencio Segura, Homer P. Emerson. Kastilla simipi tikrasqawanpas Reina-Valera, 138 pp.
• Señorninchik Jescristopa Musuq Testamenton. Lima, New York, London: Sociedades Bíblicas Unidas (United Bible Societies), 1958. Tikraqkuna: Florencio Segura, Homer P. Emerson.

Qillqasqankuna

• Diospa Siminmanta Takikuna. Florencio Segura. Ñawpaq kaq liwruchasqa: 1946 watapichá (?); 9 kaq liwruchasqa: Lima – Ayacucho: Comité de Literatura Misiones Presbiterianas Mundiales, 1979 watapi; 18 kaq liwruchasqa: 1979 watapi.
• Allin Willaykunaq Takinkuna. Callao [Peru] 1951 (huk takikuna)

Hawa t'inkikuna

• Deborah Herath Chapman: Florencio Segura – Communicating Quechua Evangelical Theology Via Hymnody in Southern Peru. A thesis presented to the University of Edinburgh for the degree of Doctor of Philosophy, Oktober 2006.
• Florencio Segura: Yuspa Siminmanta takikuna (RUNASIMI.de)